Patacas e outras tarefas de marzo...

A esencia da pataca: unha busca ao interior e a esencia mesma do tubérculo, como se ve agora pero nel hai máis... o que pode ser-convertirse-dar de sí... o todo pataqueiro:
visións de Xoel, Angel, Martín e Lucas... como vedes a mesma pataca prende distintos estímulos :)

Primeiros collages de Martín e Xoel, súper persoais!!

E seguimos ao noso ritmo co fanzine, esta é Paula "tuneando" a la joven de la perla :)

e seguimos tamén co dia a dia: aprendizaxes de cor, ou coa tableta gráfica -da que nos falou na súa visita Patricia Saavedra- ...

...e cos nosos traballos de óleo secando para retomar en Abril...xa que esta semana estarei ausente traballando fora da cidade, noutra nova aventura!

pintando flores, detalles do traballo diario ;)

Os mércores estivemos pintando flores, coincidiu que Africa, Chus, Manolo e Pili GV elixiron pintar flores a un tempo... e a clase florida :)

Como vedes cada unha-un no seu estilo e co seu gusto ben diferente, aí está a marabilla do asunto: cadaquén ten as súas motivacións e os seus gustos e hai que levalos adiante e desfrutar co proceso...

Africa pinta por vez primeira, como vedes dáselle moi ben!!

Pili GV remata os detalles dunha obra ben linda e delicada

Manolo pinta as flores do seu xardín ;) sempre dende a súa mirada persoal

Chus F. remata estes xeranios floridos que quedaron moi lindos e coloridos :)

Que virá despois destas flores? que elixirán pintar estas persoas inquietas e curiosas? Esa é unha sorpresa que irei descubrindo estes días e logo, co paso das semanas, irei desvelando nalgunha nova entrada neste blogue ;)

Para min é un agasallo ilos coñecendo a poucos, a través de esas  decisións; de ese gusto ou inclinación cara unhas cores, uns temas,...  un misterio propio das clases de pintura.

jelly print: chegou a xelatina!

Coñecín estes días a unha persoa chea de paixón pola súa “adición” a facer encadernación; faloume da jelly print e do fácil e interesante que podía resultar... sempre atopas persoas dinámicas e positivas que te moven a experimentar sen medos ;)

E así chegou a xelatina ao tallerdepolo. Jelly print , monotipos divertidos experimentando con elementos vexetais, papeis, recortes... o que tiveramos a man; máis cores e probar para aprender e divertirse co proceso .... sen máis, ou si?

 

Merquei xelatina ( a máis barata que atopei, sabores limón e piña) a primeira que fixen quedou demasiado branda e desfíxose toda! Logo empreguei menos auga para facer as pranchas e usei moldes de plástico máis cativos e manexables; así quedaron máis compactas e serven perfectamente para experimentar, probar e divertirse... con moi bos resultados.  :)

Así quedaron as pranchas de silicona tras unha sesión de dúas horas escasas ... sonche resistentes dabondo. E unha actividade divertida e moi creativa.

Fomos de feiras con ReciclArte: 8M e I Eira das Artes

Nesta semana coincidiron dúas feiras na cidade coruñesa, as dúas vinculadas coa Eira das Artes. A primeira tivo lugar con motivo do 8 de marzo, onde fomos invitadas (as artesáns que formamos parte da Eira das Artes máis outras artesáns e mulleres con proxectos feministas) a participar nunha feira chamada "Feira de Creadoras e Artesás"; fantástico escaparate e punto de encontro ao redor da Fábrica de Tabacos, acompañadas de música (Habelas Hainas), moteiras, performance, danza... nun ambiente de festa e encontro nun espazo que aínda está por descubrir para eventos e actividades varias.

Outro espazo aínda por aproveitar é a Fundación Seoane onde se realizou a I Eira das Artes ( a semente primeira e previa foi este Nadal na chamada Feira de Inverno).

"A Eira das Artes somos un grupo de mentes e mans inquedas que traballan na Coruña e arredores. Agora decidímonos a organizar en común este mercado para amorasar as nosas creacións, coñecernos, coñecervos... un proxecto que nace dende a ilusión e a complicidade de moitxs creadores."

Teremos ocasións de ir coñecendo máis e seguir a pista a este proxecto xestionado polxs propias artesás, que inclúe obradoiros, poxas, música... e a saber que sorpresiñas nos prepararán en próximas edicións :)

https://www.facebook.com/Eira-das-Artes-331140630615262/?fref=ts

https://www.coruna.es/portal/es/ayuntamiento/noticias/detalle-noticias/el-ayuntamiento-celebra-el-8-de-marzo-con-una-invitacion-abierta-a-la-ciudadania-para-participar/suceso/1453616008131

visita de Patricia Saavedra e algún Experimento

Tivemos o pracer de recibir a visita de Patricia Saavedra Guillin, que veu o sábado a falarnos sobre o seu traballo e a súa experiencia co mundo creativo. Unha moza chea de vida e enerxía que nos trasladou ao seu mundo e experiencias creadoras (no cómic, debuxo, fotografía, ilustración, modelado...) cun discurso sinxelo e cheo de optimismo que soubo conectar cxs máis pequenxs e que nos fixo gozar e visualizar moitas posibilidades.... agradecidxs quedamos pola túa visita Patricia!

Podedes ver algúns dos seus traballos no blogue;

http://patriciasaavedraart.blogspot.com.es/

Experimentando estamos co mundo da xardinería... porque "amadriñamos" un cachiño de terreo que temos preto, está algo descoidado e cheo de lixo e nós imos plantar algunha flor tratando de darlle un pouco de cor. Contamos coa colaboración de veciños e veciñas que se preocupan de ter limpo o espazo e regan cando vai moita calor; así é posible que salgan adiante as plantas... xa veremos nus meses. ;)

Tamén estivemos facendo probas coa acuarela líquida, e non deixamos o fanzine que nos ten moi ocupadxs e nos fai repasar e ter ao día a anatomía humana :)